Bere belaunaldiko idazle afrikar eraginkorrenetako bat da (Abba, Nigeria, 1977). Bere lanetan feminismoa, arrazakeria eta bere jatorrizko herrialdeko tentsio politikoak landu ditu. 2003an Lore purpura argitaratu zuen; horri esker, Commonwealth Writers’ Prize saria eskuratu zuen.

Eguzki hori erdia (2006) eleberrian Biafrako gerra zibila izan zuen hizpide, eta obra horri esker Orange Prize saria eskuratu zuen. Horrez gain, Guztiok izan beharko ginateke feministak (2014) saiakerak ospe zabala jaso du feminismoa ikuspegi irisgarri batetik lantzeko gaitasuna duelako. Nigeriako historiak eta bere testuinguru kultural propioak eragin handia izan dute feminismoaren inguruan duen ikuspegian.